يا النجفة العيونك لي البعيد بتصايد: شعر: الهمباتي الأغبش

˛ˇ

يا النجفة العيونك لي البعيد بتصايد
امسيت منهن كاتب حروف وقصايد
ما دام هن بسون في قلبنا فصايد
أحسن يبقي بينا وبينن الف وصايد
٭٭٭
يا سيد السماحة اللي المحاسن قائد
اعطف دام بقيت مالك حسوسنا وقايد
قلبي الراضي ضيمو وفي المهالك خايد
أنا متبري فعلو وباقي منو محايد
٭٭٭
وين الديمة في الليل كنتا بتناجابو
وين النال رضاي ونلتا كل إعجابو
وين الغافرو من عين الخلوق لجابو
ودع وخلا طيفو معايا اتحجابو
٭٭٭
الشاعر البليغ في قول كلامو ونصو
ما بقدر يجيد أوصاف كتابو وقصو
فرع الخيدران الدابو لين فصو
ضباط بي نِجُومُن حرسو ما بتوصو
٭٭٭
خبرك من قبيل لي الطيوف تمنو
كونك جاي صاد من المنام خمنو
عيني لي رؤاك كم طولن يتمنو
ريداً شايلو ليك بدري الضلوع لمنو
٭٭٭
من لاقيتو مريودي المطول منو
شفت الذوق ملازم للسلام في حنو
معزول عجوة المحس السبايطو اتتنو
رَجّع قلبي لي المو وحسارو وجنو
٭٭٭
عشوقتي الفيها انواع الوسامة
غير الرقة والذوق فيها شامه
شبيهة الجافل البي صيو هاما
معذور قلبي واقع في غراما
٭٭٭
بعد ما قلبي فات الريدة عافة
أصبح نمرة ون رافض الوصافة
جدياً ظاهرة في نصو النحافة
لحاظو تخلي عاتي الجن يخافا
٭٭٭
يا قلبي المهود طال سراكا
شايف كل محاسنو ولا يراكا
ما دام لسه تايه وما دراكا
ايه يجديك من هذا العراكا
٭٭٭
كتير ساسقت فوق الريدة حافي
مساقد بالسنين نافر لحافي
عشمي الحظ يحن ما يبقى جافي
الاقي المنو فر النظرة شافي
٭٭٭
كم داريت لهايبو وليها خافي
مديت ياما ضرع الريدة دافي
مهما يبقى نافر ولي منافي
غافر ليهو دماع عيني عافي
٭٭٭
بايت دمعي فوق أجفاني طافي
بي فوق السهر أصبح اضافي
يا أسباب اذايا وسر تلافي
قلبي معاك اظنو دليل وكافي
٭٭٭
باين ليهو في الريد اختلافي
زايد دلو وازداد إئتلافي
البي محيو عجل بي كفافي
جيت لي غارو قاصد اعتكافي
٭٭٭
جلا الباري لي محياكا صور
كم أخجل ضياك ذاك المدور
عاشقك لملم الأشواق وكوّر
الا سماك بي الاشهب تسوّر
٭٭٭
ترا الصُّلاح مع الأسحار قامو
وانا البين الخلوق محبوبو لامو
غافر لي النجوم وعيوني هامو
طارو الفرو يلصف في ابتسامو

أكتب تعليقك

لن يتم نشر عنوان بريدك الإلكتروني.

12 − 1 =