يخلق من الشبه «ترزي» عصام محمد نور يخيط بدلة البشير..!

شندي- عبد القادر رحمة
«1»
في الفرقة الثالثة مشاة بشندي يعمل عوض الكريم محمد عوض الكريم أو «عصام محمد نور» شندي فهو يحمل ذات الملامح و«الصلعة» الماخمج… واشتهر بشبهه الشديد للفنان عصام محمد نور، الشيء الذي جعل عصام محمد نور يبحث عنه وصارا اصدقاء… حتى ان شقيق عصام الأصغر في إحدى زياراته لشندي قال بس وروني الزول البشبه عصام أخوي دا وين؟
عوض الكريم من مواليد 1967 ويعمل ترزياً للفرقة الثالثة مشاة وجعله الشبه الذي يجمع بينه وبين عصام من أحد مشاهير شندي..
«2»
يحكي عوض الكريم :
الجماعة سموني عصام عديل في شندي حتى البنية الجسمانية بينا متقاربة طولاً وعرضاً والجلحات دي زادت الشبه أكتر بس أنا صوتي شين وعصام فنان.. ومن الطرائف كنت في السعودية سنة 2000 في مهرجان المدينة المنورة الثقافي وكان عصام مشاركاً.. ومعجبيه كتار في السعودية وقبل ما الحفلة تبدأ.. كنت واقف فى الصالة الجماعة قايلني عصام اتلحونى ليك سلام لما جابوا لى _ قطايع _ وفي واحدين أخدوا معاي صور تذكارية وشالوا تلفوناتي أصلوا ما فتحت خشمي لحدي ما عصام الاصلي جاء وطلع المسرح الجماعة عرفوا المقلب…!
«3»
والاظرف من كدا برضو جماعه لاقوني ليك في جدة وكان عصام هناك عزموني ليك جداد أكلت لي _ قفص كامل _ لما مليت بطني بعد داك قالوا لي يا استاذ اراحكا معانا غني لينا شوية.. عندها قلت ليهم ياجماعة أنا عوض الكريم من شندي وعصام دا صاحبي وبنتشابه ساكت..!
«4»
وتكرر ذات الموقف فى الخرطوم إذ طلب منه أحد الشيوخ كبار السن بعد أن التقاه في مكان ما أن يمدح ليهم المصطفى «ص» واعتذر لهم انه ما عصام دا شبه ساي لكنهم اصروا ولم يصدقوه إلا بعد أن مدح لهم لكن بصوت «شين»…!
«5»
بحكم عمله كخياط في القوات المسلحة يقول عوض الكريم ان أشهر الشخصيات العسكرية التي حاك لها البزة العسكرية هم الرئيس عمر حسن احمد البشير والشهيد الزبير محمد صالح وابراهيم نايل إيدام والشهيد ابراهيم شمس الدين والطيار فيصل مدني مختار وصلاح كرار وكل القادة الذين مروا على قيادة الفرقة الثالثة مشاة بشندي..
وقد جعل من الشبه الباين لعصام محمد نور صداقة متينة معه يتزاورون كلما سنحت سانحة ويعيش عوض الكريم الترزي البارع على زيط الفنان عصام البارع.