نحن متلنا في الحوبات جزم مافيش نحن عدونا يوت داقنو دق العيش

الهمباتي الأغبش : نحن مغارز الوجع اب وحيح ونحايب

@@@
˛ˇنحن صواقع الليل اب هويد وعويش
نحن متلنا في الحوبات جزم مافيش
نحن عدونا يوت داقنو دق العيش
نحن الفي البلاد سمونا ناس الديش
@@@
نحن العركة اسيادا وبنخبر خودا
نحن نواجه الصقعة ولظي العنقودا
نحن الهاون الفتق اقاصي حدودا
نحن الفرسة اسياد ومطامير جودا
@@@
نحن دهامة في الليل اب هويش ودبايب
ونحن مغارز الوجع اب وحيح ونحايب
نحن القوة والجسم المفتل وطايب
نحن الجانا من قهرتنا بصبح عايب
@@@
نحن الماهبر رايش مفرتق كورنا
نحن قهارا في الغارات بيبين سم فورنا
نحن عدونا بنعيقو ونكمل دورنا
تشهد بينا كادوقلي وجنوب دارفورنا
@@@
نحن صقور علي الجوية باين كارنا
ونحن الدانة في العركات تلهلب نارنا
نحن نضاير الجافل بنلحق تارنا
نحن عدونا كان لاقانا بصبح فارنا
@@@
نحن رواجم الصاقعة ومحادر السيل
ونحن جوارح الجو البكب سجيل
نحن غبار مفازة علي العيون بنكيل
نواجه هجمة الدغش اب هواجس وويل
@@@
نحن الدوشكا والبازوقة والهجانة
نحن السيبة والقرنوف ونحن الدانة
نحن الفي ام لفيخ ناراً يوج دخانة
نحن نقدد الجن ان دقس لاقانة
@@@
ما فينا المسردب والجفل من رايش
نحن ضربنا مو مجلي ومودر وطايش
نحن جهامة نحن قهامة نحن حمايش
نحن شهيدنا دون خلق الله دايما عايش
@@@
نحن الموت نكوسو محل يكون بنخبرو
نحن الجانا في لحظات نوسدو قبرو
نحن ضربنا نص الراص فقه بنجبرو
ديمة عدونا في الناياب مقدد دُبرو
@@@
ما فينا الدفن دقنو ومجوغب بارك
بي ايدينا بنكاوش خصيمنا نعارك
يوم ضرب المدافع والغبار الدارك
البارود نكرفو الفي الجسوم متفارك
@@@
بارودنا اندفق فوق ظرفو فاكي شرارو
ما بتشوف معاي غوش الكرور العارو
ضارب سيبية الدوشكا المولعة نارو
عازف بي مزاج خلا السعوب اتجارو
@@@
القصطير مطر والجو كتم دخانو
والجلد الهشوش الليلة يوم سَلَخانو
الميم دال هبر ضاقو السجم سخانو
اقدل يا صبي اوعك تجيب رَخَخانو
@@@
الكاتيوشا قالع والطيور مرعوبة
والبي تن كلح والراجمة بان ملعوبة
ضوقتو الخلوق مر ام لفيخ وصعوبة
خط ناركم يمين هدّا الجباب وسعوبة
@@@
يوم دقا البروجي علي الفريق نقارة
عرضو الناس طرب فرسة وثبات وجسارة
وكتين ام لفيخ في القُبسة شفنا شرارة
خلينا الصقور تتعشي جوة الدارة