مجادعة في الدوبيت :مجادعة بين الهمباتي الأغبش وعوض الله فرح

alsahafa-18-12-2016-398الهمباتي الأغبش
نومي الكان مدمدم بي الكوابيس عفتو
من ما جاني زاير وبي المحاسن شفتو
شوقي الاضحي باتع ومن غيابو غرفتو
هسع ماشي زايد وقلبي يتلف خفتو
@@@
عوض الله فرح
ماشي وجاي الشارع مساسق طفتو
عشمان يفتح المالك فوادي شرفتو
ريدي معاهو قصه الناس بتحكي طرفتو
سياف ريدو عاد واحسرتو البتكفتو
@@@
الهمباتي الأغبش
كتير سألوني منها وانزويت بي ردي
مون خابرين دا سرا ليهو ما اظن ادي
فريع المحب الفوقو النحول بتعدي
عطرو نشمو شم لي شوفتو ما بنودي
@@@
عوض الله فرح
البهواهو من جوه القلب بي جدي
بيني بينو ياخوي الطريق متسدي
فوق جمر الصبر مشتاق وواصل حدي
من الفرقه والوجع العلي مشتدي
@@@
الهمباتي الأغبش
حسسا كاتمو قبل اليوم قسم ماجاني
رجع قلبي صاد من الوحيح نجاني
مربوع القوام الانكتب سجاني
طير نومي شتت فكري حير جاني
@@@
عوض الله فرح
المي الفي بحار حزني العميق ذجاني
كلو من السحي البي طيفو ما ناجاني
البي كلمة الحب مره ما حجاني
هو العاد لي آلامي وكتر احزاني
@@@
الهمباتي الأغبش
يوما جابو يا صاحبي السعد حاويهو
خابر حسسي متنفرت نبح عاويهو
قلبي الاضحي مرضان والوجع لاويهو
اصبح ريدو بلسم وقربو هو بداويهو
@@@
عوض الله فرح
فوسيب منصح الوادي الردف تلويهو
عمرو ولونو مريودو المتيم فيهو
حالتي خطيره والنوم لي زمن مابيهو
يا السافك دماي ندائى ماتلبيهو؟
@@@
الهمباتي الأغبش
يا عوض الله المي البيا ماك داريهو
سببو الادعج الرفع السماح ساريهو
قول لي مسيكة القلب العدم حاريهو
زولك دارو قربك والوداد شاريهو
@@@
عوض الله فرح
ياالهمباتي ريد الفي العيون قاريهو
رغم موانعو والفرق البعيد طاريهو
عاشفي الخدو بتلاصف متل تبريهو
صدرو عليهو صاروخا غتيت عبريهو