مجادعة في الدوبيت .مجادعة بين الهمباتي الأغبش وعوض الله فرح

alsahafa-25-12-2016-498سفر الشوق علي مكتوب عديل امشيلو ومن باقي الوداد ستفتا بقجة بهيلو
مجادعة بين صلاح ود مسيخ والهمباتي الاغبش
الهمباتي الأغبش :
وفي بقجة قلب عبيت دفستا هدومي
لي سفرة هواي اشواقي دايرة تقومي
تذكرة الحنين مقطوعة بدية يومي
قايم من دغش ياعيني احسن نومي
ود مسيخ:
لي سفرة ودادك جبت شنطة ريدي
شاططني الحنين لي الجارية جوة وريدي
وكالات الوصال قبلت صكوك توريدي
شالت مني إيميل الظنون وبريدي
الهمباتي الأغبش:
من دغش الحنين وعين السواد ماشافت
قم شايل الشجون مخلوع سريع اتخافت
جزلان لول هموم تابناهو ايدي اتلافت
لي المركوب صبر كرعيا ما تتحافت
ود مسيخ:
رصرصت المشاعر في حقيبة أحلامي
جيبه المن تحت جدعت فيهو أقلامي
دفاتر الانتظار ليهن مكمسد ورامي
جايك ياام دلالأ فوق ندايدك سامي
الهمباتي الأغبش:
سفر الشوق علي مكتوب عديل امشيلو
ومن باقي الوداد ستفتا بقجة بهيلو
خطابات الغرام الكان حزنا تزليلو
شلتها بي الحنين معاها جب منديلو
ود مسيخ:
بعد ستفت لي ريدك دخل حمامي
حتيت مني باقي الذكريات واوهامي
البدلة ام ذراير والقميص قدامي
ونص الفرقة داك كربت ليهو حزامي
الهمباتي الأغبش:
بعد ستفت لي ريدك بقج ختيتا
اتوضيت تمام صلاتي ديك مانسيتا
تبروقة الوصال زكري ووئام لميتا
من باقي الخيال سيرة البعاد جليتا
ود مسيخ:
لملمت ألاماني الفي السرير مشرورة
راجعت العناد وإتنقط الماسورة
تلفزيون جفاك الباثي صدك كورة
طفيتو وفقد بي سفري صوتو وصورة
الهمباتي الأغبش:
قفلت الهواجس الفي الحويش مذكورة
باب تكل البعاد فيهو الجخانين بورة
زير الصي يباس وحيفتو ديك مكسورة
وبي حبل القنع رابط السرير ساجورة
ود مسيخ:
بعد تحصيني من العين وكل عوارض
إتوكل علي النزل صلاتو وفارض
بتاع أمجاد وقف عن باب شقاي متعارض
قالي النية وين قتلو ام جمالأ قارض
الهمباتي الأغبش:
من جردل عذاب شطفتا لي كريعاتي
دابغ زيت الصبر ماسح كمان شنباتي
في شوال قنع لميت هناك نعلاتي
وباب شارع البعاد جنزرتو بي طبلاتي
ود مسيخ:
في جواز هواك حاشر تذاكر حبي
تاشيرة غرامك من تساهيل ربي
كرت الالفة من دار السلاح الطبي
وبي أوكي الحنين جيب الحقيقه معبي
الهمباتي الأغبش:
فوق صحبة بعاد جاري العزيز متحزم
صناعياً قدير مفتاح عجل متنظم
فوق موتر امل رادفني تب متلزم
لي شعبي الرحيل وداني ساك متأزم
ود مسيخ:
الصالة ألمكيفه بي وعد لقيتنا
موايكأ في الحيط لي دخول هواك ندهتنا
دموع عزالنا عند ساعة الوداع بلتنا
فوق سير الوصال ختينا لي شنطتنا
الهمباتي الأغبش:
في الشعبي البعيد نيسان رحيلي لقيتو
سفريات السلام الكشكو اول جيتو
شاي لبن فراق انا جاغمو واتدفيتو
ونيسان الرجوع شحنوهو تمتمو زيتو