مرابيع في الغزل والمحبة والهجران .كلمات الشاعر : بيتاي ود الضو

ALSAHAFA17-4-2017-334كل ما دفتر الايام بدينا قرايتو
تعكس صوره الحاله الحزينه مرايتو
قلبي الناضجه تجربتو وكتيره درايتو
سقطت في ميادين العواطف رايتو
@@@
ابوح لها بالمشاعر وبيها ما باحت لي
اوحيت بالقصايد وبالصدود اوحت لي
شفتها مره واحده وتاني ما لاحت لي
قول يا جامع الرايحه الدروب راحت لي
@@@
يا القايم مشرق ومتجه ناحيتو
شيل شوقي المرصعه بي حناني تحيتو
قول لي العارف إحساسو وعظيم تضحيتو
ماينسي الوصايا الفي انتظارها ضحيتو
@@@
البصر البشوف سيد المحاسن عاذرو
يسهر والمواجع لا الصباح بتوازرو
مبروم الحشا النزل المبرع فازرو
كاتل دوله كاملة ومستمره مجازرو
@@@
كل ماتجيني خاطره وانتظر تكوينها
بملا حواسي شوقك وببدا في تدوينها
ماضي ايامنا والفتره الجميله سنينا
فاضل عندي ذكراها وليالي حنينها
@@@
ماضيك يا الوصالك ماني داير اكوسو
باخد منو عبره وبنفعني دروسو
حبك ببقي ذكري وبي مراره بدوسو
قادر قلبي ينساك والعجنتو تعوسو