الغنا من زمان عند البنات معروف..ميادة خضر «الخنساء بت المك»

صوت البت تغني وفي النميم بكايه
بنونه الراسيه والقول الجميل التايه
بعدهن جينا غنينا ورفعنا الـــــــرايه
وهاك اثباتي دوبيتي وسمعت غنايه
@@@
الغنا من زمان عند البنات معروف
وشغبه الاولى كتابة نميم وحروف
الشعر القيافه ومن بحر مـــــغروف
اكيد دوبيتنا متوازن عديل مصروف
@@@
نحنا الجينا شكلنا الحـــــروف غنينا
نحنا بنات ودوبيتنا النــــــضيف نقينا
نحنا الصوت ومعنى الكلمه ما تشابينا
نحنا بلانا مسخانه التــــزول بي عينا
@@@
والبت في الشعر حتماً توصل حاجه
كان وصفت جزم تنهر تقوم تتناجه
كان ناحت تنوح زي التكون محتاجه
كان دارت فخر تفخر وتلبس تاجه
@@@
أمي بنونة بت المـــــك ورثت أشعارا
وزيها في حماسي وفي ثباتو جدارا
شعري بقولو فوق اهلي واخوي عمارا
بت العزة بت المك انــــــــــــا الشكارا
@@@
بت أمات قناع عزة وشرف مضمونة
وانا في ذاتي بت المـــك اياني بنونة
لي اعداي سيوفي مطرقة ومسنونة
لا برضى الحقارة ولا بنــــــوم مغبونة
@@@
ياني بنونة ياني الـــــعازة انا السودان
بخطب في المنابر وفارسة في الميدان
اخش الحارة واقهر قــــــــاهر الديدان
جرعة عقدة من ســـم بقبض الوردان
@@@
شعر شغبه وحماس شغبه البقولو زمان
مفروس فيا ترباة والدي عـــــز وضمان
قمت صغيرة فوق التقـــــوى والايمان
عدوي بخلي للصقار حـــــتت كيمان
@@@
وزي ما حميرا غنت فوق حسن شكرت
علي عرش النميما بدعـــــت واتحكرت
القاصدني قولو وقعت واتـــــــــــوكرت
في المرض البشل جسمك يخليك كرنة
@@@
ست النــــــــمة زي بت الأمين التاية
حماس الناسانا ان دق الشتم قوقاية
شعري بيحفظو الناس يحكو بيهو حكاية
بزيد هوشة القلوب وحروفو نار شواية
@@@
وزي كل العظيمات في بلادي بكون
زي رابحة الكنانية وشجاعة الــدون
بت الختو تاريخ وانشهر في الــكون
سودانية عزة وفوت شرف مضمون
@@@
نسل أمات عزاز ستات فراسة قبيل
حافظات الشرف ضربنبو موج النيل
الآن عزتن موجودة في يالـــــــليل
شاعرة وللمكارم ببقى نــــور ودليل
@@@
حت في جيلينا نفس الحالة ياها الحالة
نغني علي القيم ونحارب الـــــــبطالة
مع التغيير وجيل العولمة وجـــــــوالة
رفعنا الراية انا وآمنة ونفيســة وهالة
@@@
جينا نجدد الدوبيت معاني وفكرة
ونحفظ للقبيل فاتونا أعظم ذكرى
غنانا يفرح الحزنان يهدي العكرة
نرقيهو ونسلم رايتو لي جيل بكرة