خد وهات بين شعراء المسدار والدوبيت .. مجادعة بين الهمباتي الأغبش وود مسيخ

˛ˇ ˛ˇالهمباتي الأغبش :
سهر الليل علي اشواقا لفح وقادا
سببو الديسو باهل وعن رقيبتو قلادا
دام الخيل تجقلب والبفوز حمادا
اصبر يا قلب باقي المحن منقادا
ود مسيخ:
بشوف نمك على سككا ازتنى اتماده
وطرانى ام فراقا كترتلو سماده
شن جابرها لى عشق الجيبو رماده
داب قدامه باجورى وجلنت وارماده
الهمباتي الأغبش:
هبش قلبي فتفات الحروق ورمادو
لقي انقاض حسايس بالسماح انبادو
لقيت حالي النميم طاير قبال هبادو
اصبح قلبي مغمول في الوحيح مرقادو
ود مسيخ:
لهيبو البقه في واجب على اخمادو
وسيفا شاهرو لي النايبات لزم اغمادو
بركة الليهو طايعات الوحوش وجمادو
ابرد من حرور جسمى الغلب كمادو
الهمباتي الأغبش:
كم طافر خيال هن شبا لي تراهو
جرحي الكان مضومر صدا تاب خاراهو
زولا رامي طوبتك هن مشيت تطراهو
تبقي اياك هشوش والهينة فيك غاراهو
ود مسيخ:
كل ما افك زفير بشهق معاى ذكراهو
بخلص لى غراما اصبحت ناكراهو
النم القبيل بيناتنا يوووت حاكراهو
ببكيها آلبهيج ولا ابقى مى فاكراهو
الهمباتي الأغبش:
خيالي يسلسل الذكري وعقب يازاني
صورا شالعة قلبي وبالنويح ناكزاني
الريد القبيل ودرتو بي حززاني
ببكي عليهو نم عقبا بجيب اوزاني
ود مسيخ:
اللي ريدو بى حالى الحديث وزانى
طلعنى السحاب فرحة وعقب لزانى
كلاما قالو كل زولا معاك عزانى
من كتر المخاديع جمله مى فارزانى
الهمباتي الأغبش:
مالك شوقي طافر وها الطعوم ضايكا
غرغر جوفي قرضايتن وحيح لايكا
الجاهلة ام نفورا والخداع حايكا
طارد ريدا كان روحي السهاد شايكا
ود مسيخ:
روحى اتعقلت علا الحنين سايكا
وبركز لى مغايسو البى غفاى طايكا
دروبا ساساقت فيها وكتر عايكا
خلت قلبى احظر صفحته ولايكا
الهمباتي الأغبش:
قلبي مداري حزنو وللخلوق متراكز
نعمنو الغميس من ريدو ديمة يناكز
الطيف الفضل جوايا ديمة يلاكز
جرجر بصري فوق عد النجوم متعاكز
ود مسيخ:
اطيب عطرو من ريحة الزهور وفواكز
كيف بناسالى عقدا بى المحالب راكز
داب مديتلو قلبى وليهو اصبح واكز
ما بتشفينى بخرة ولا بتتطبنى مراكز
الهمباتي الأغبش:
حسسا فيا طافر يا رفيق لجني
فوق صدو ونفورو عليا صار متجني
كم ضحكات عيونو وبسمتو بحجني
بخرات الفقير من ريدو ما نجني
ود مسيخ:
نواعسا ليهو من دون الخلوق ناجنى
دخل ولقيتو بى حالى الحديث ساجنى
العايسنى فى صاج فرقتو وعاجنى
راد عظماء المجالس وغير سبب كاجنى
الهمباتي الأغبش:
هواجسا من دماي اصبحت يوت نقابا
كم سارح خيال عكس النجوم شقابا
القلب القبيل بي الريد سعد بقابا
هسع في الوحايح بالفراق اشقابا
ود مسيخ:
حلاته وكت تجيك بى التوب ورابطه نقابه
تخليك ساهى درويشا عنا التقابه
القلب القبيل لى ريده ما ايتقابه
استاهل لهيب ناره الخليجى ثقابه